يا بوي

(يابوي)


يا بوي أنا من ضوّك أشعلت ضوّي
و الله ما تفنى و لو كنت فاني
شربت علمك في مراحل نموّي
حتى قوى عودي و غنّا لساني
تذكر ضناك الحالم اللي ينوّي
صار أكبر من أيّة نوايا و أماني
يا ليت عمرك طوّل و عشت جوّي
و تشوف كيف أنجبت لك عمر ثاني
عشقٍ على حبل الوريد متلوّي
لهواية التحليق وحدي خذاني
ما ضقت من باكر و أنا أقول توّي
هذا زمان الغير و إلا زماني
ودّي تحدّثه النجوم بعلوّي
دام الثرى يحلم بحزّة طماني
من لا دخل بين الرجال متقوّي
ما ظنتي يصهل صهيل الحصاني
و اللي على جال الضلوع متطوّي
تباشري بمفارقه يالمحاني
و الله لأسوّي ثم أسوّي و أسوّي
و إلا فلا باسمي فلان الفلاني
ماتوا عداي و صار وقتي عدوّي
لابو دقايق ساعته و الثواني
أنا على ذاك المكان متروّي
بس الوعد لا قلت هذا مكاني