الحشيمه

الحقائب والمطارات العتيمه
والدروب اللي قبل نوصل عتيمه
والخطاوي اللي تعبها الملابس
كيف عاد حمولها السود المقيمة
وابتسام الناس في وجه المسافر
ومالهم شغل فجحيمه وفنعيمه
والضيع اللي بلا مأوى وملفى
لا شقيق ولا صديق ولا عزيمه
وسايق التكسي واخبار الاذاعه
وريح كشنات السيارات القديمة
كلها اشياء تقتلني فرادا
كيف لا اجتمعت على قلبي وضيمه
انا واحد والخصوم الف
وجروحي اتكاثر واختيارتي عقيمه
انحرف ولا انجرف والا اتطرف
كلها امرار واحلاها اليمة
ما اخترت اكون عاشق او شاعر
عالم الاقدار ما ينصف غريمه
والمحبه معركة ما فيها رابح
يتساوى النصر فيها والهزيمه
اغلب الاشيا اللي نغليها توافه
لو انا ما نغليها ما كان الها قيمه
حبنا للشيء حب النا اساساً
شوف الانسان ومشاعره اللئيمه
وانا ما احب اللي احس انه شي ثاني
ما لقوا له اسم او كنية سليمه
من يزور اعداءه ويعطف عليهم
من يعافب نفسه ويرضي خصيمه
من يحس الناس كل الناس اهله
من يحس ان روحه بتبقى مديمه
ممكن يبكيني مقطع شعري تافه
وممكن العب عام مع طفله يتيمه
وممكن اتعاطى منشط او مخدر
مرحله جدا عواقبها وخيمه
حس يعلوا بي الى حد النبوه
ويوم يدنوا بي الى حد الجريمه
انا باقيني انا ربع اللي كنته
مع امل كذاب واضداد وضليمه
الاوديه مسرح بداياتي البريئه
ما اعتقد باقي بها وادي واهيمه
علمتني من عشقت ان لا اراوغ
اقصر خطوط الوصول المستقيمه
فما يخلي الرجل يحب بكل قوه
الا لامن حب له وحده حشيمه
اه لو شفتوا الوشاح اللانهائي
منهو منكم شاف شمس تجر غيمه
الحليب الورد الصبح التسامح
هي جميع اشياءنا البيض الرحيمة
كل ابن ادم مذمم بالطبيعه
الا هي مافيها أي حاجه ذميمه
بنت قلبي وام روحي واخت عيني
سيدة كل العلاقات الحميمه
علميها يا طيور الصبح عني
لا كليت الخبز من كف الكريمه
ان وجودي وجد من باعوه ناسه
عقب ما باعوا ركايبه وحريمه
واشتراه اللي من اول عبد عنده
وحط فرقبته وفي وجهه وسيمه
كل ما اذكر طاري الفرقا وانا اعرف
الضروف اللي بلا رحمه وشيمه
واحدٍ مثلي ليا طال انتظاره
ما تلاقي الريح باقي من هشيمه
هي تلاشى كنه ما كان وما كنّه
قاضي الحاجه وقطّاع الخريمه
شاعرٍ بيخلد التاريخ اسمه
من فضل حسه وفضل اهل النميمه
رمز .. لكن بعد موته لان قومه
تحترف تمجيد الاموات العديمه
عاش حقبه من حقب عصر التمدن
السما فيها يتبرى من اديمه
علميها يا طيور انها وفعلا
حيّدت صميم قلبي عن صميمه
علميها يا طيور انها وشكرا
لخصت لي كل الاحداث الجسيمه
تخسر الدنيا وتخسر كل حاجه
عندما تخسر لك انسانه عظيمه
عقاب بن المساعيد