.بسم الله الرحمن الرحيم
يحيى العزيز بعزة شامخ الرأس
وإلا الذليل يموت في عز ذله
ومن عاش شاف في دنيته كل الأجناس
ومن كل جنس وكل مذهب ومله
ومن عاند الدنيا توريه الأتعاس
يلقى القهر ويموت في وسط غله
راع الوفا ممشاه مع خيرة الناس
وراع الردى راع الردى صاحب له
ومال الردي في مجلس العز مجلاس
اصلاً ولا حتى يجيه وياصله
بعض الرجال اغلى من كنوز الألماس
سيف ليا جات اللوازم تسله
له فزعه تظهر ليا صرت محتاس
ودروب الوفا ما كل رجل يدله
وبعض العرب من تحت الاقدام ينداس
وبعض العرب من فوق راسك محله
وبعض العرب صداقته دوم نوماس
وبعض العرب صداقته لك مذله
وبعض العرب لا مات تجزع له الناس
وبعض العرب لو مات محد(ن) فطن له
لا باس ياقلب يبي المجد لا باس
مادام فعل الطيب فينا جبله
ما عاد فالدنيا مسارات و اوناس
عله تقفي عنك وتجيك عله
ما كل كيف يسبب لراسك عماس
والكيف ما تلقاه في كل دله
اعوذ بالرحمن من كل وسواس
ومن كل حاسد شال في القلب غله
أخذتلي في شبه العمر مرواس
وجربت فالأصحاب من كل شله
ولقيت من ممشى الرديين الأفلاس
ولا كل رجال يناسبك دله
لي فالملأ نظره ومبدأ ومقياس
ولا اقول اخذت العرف والعلم كله
لكن لي قدوه عزيزه ونبراس
والجيد أصله للمكارم يتله
والبيت يبقى دام مبني ع ساس
وأن كان ماله ساس مادام له ظله
والأدمي عمره محدد بالأنفاس
رحال في دنياه والقبر حله